Khawzawl, 28th June, 2023: Vawiin khan Deputy Chief Minister Pu Tawnluia'n Khawzawl Dinthar vengah DRDO building, Khawzawl District a hawng a, Rural Development Minister Pu Lalruatkima pawhin khualzahawm niin he hun hi a hmanpui a ni.
Khawzawl DRDO building hawnna inkhawmah hian Deputy Chief Minister chuan Khawzawl district tichangtlung tura Mizoram sawrkarin hma a lakna kawng hrang hrangah lawmawm a tih thu sawiin, Mizoramin harsatna chi hrang hrang kan tawk chung pawha theihtawp an chhuahna kawngah Minister te leh sawrkar department hrang hrangte chungah lawmthu a sawi a ni.
Khawzawl district a kuthnathawktute thawhrimna malsawmin a awm tih sawiin Pu Tawnluia chuan khaw hrang hrangin thlai leh theirah chinga hma an lak dan leh ran vulha hma an lak dan a tarlang a, a theih ang angin an tharchhuahte an sawngbawlna tur khawl an ruahman thute, chhungkaw tam takin eizawnna mumal tak an neih theih tak thu a sawi a, kuthnathawktute hmalakna leh sawrkar hmalakna in rah tha a chhuah a hmuhin a thinlung takin a lawm tih sawiin, awmze neia hmalak chhunzawm zel an tum thu a sawi a, theirah leh thlai bakah sangha ah tan lak thar leh tum a nih thu a sawi bawk a ni.
Khualzahawm RD Minister Pu Lalruatkima chuan Khawzawla DRDO building hawn a ni ta chu lawmawm a tih thu a sawi a, DRDO staff zawng zawngte tanrualna a fakawm a tih thu a sawi a ni. Mizoram sawrkarin district thar pathum a puan te tihchangtlun kawngah theihtawp a chhuah mek tih sawiin, a department chan te pawh indah kim turin hma an la mek a, Revenue office tihchangtlunna tura hma an lak dan te tarlangin, District Information and Public Relations Officer pawh district thar tina awm turin appointment order tihchhuah a nih tawh thu a sawi a ni. A department kaltlanga hmasawnna hna an thawh chi hrang hrang tarlangin mipuite pawhin kan bengkhawn a tul a, umpha turin kan inbuatsaih ve a ngai a ni a ti a. Mipuite nen kan thawhho that a tul avangin sawrkar tha nei tur hian kan zavaia kan tan tlan a, kan inngaihven tawn a ngai a ni a ti.
Khawzawl District bawrhsap Pu K. Lalrohlua pawhin Khawzawl District aiawhin sawrkar chungah lawmthu a sawi a, Khawzawl district chhunga kuthnathawktute hmalakna chi hrang hrang bakah sawrkarin hmasawnna hna a thawh chi hrang hrangte a tarlang bawk a ni.
Vawiin a hawn tak Khawzawl DRDO office building hi MNREGS leh MLALADS convergence a sak a ni a. Implementing Agency hi DRDO, Khawzawl district niin, cheng nuai 166.91 sen a ni. March ni 24, 2021 khan Deputy Chief Minister hian a sak tanna lungphum a lo phum tawh a, August ni 20,2021 a sak tan niin June ni 27, 2023 a sak zawh a ni.
A building hi IS Code for Seismic Zone-V specifications anga design a ni a, concrete structure atan hian IS Grade 20 (M-20) hman a ni a, Steel Reinforcement Design & bar bending zawng zawng hi IS 456 Design Specifications anga siam a ni.
Building hi chhawng li a sang niin ground floor hi square metre 165 a zau a ni a, a dang zawng hi square metre 145 a zau niin a vaia belhkhawm hian square meter 600 a zau a ni.
Ground Floor ah hian chowkidar quarters, canteen leh lirthei dahna (vehicle parking) a awm a. First floor ah Establishment Section leh officer room 2, Second floor ah Project Director office leh officer room 1, Third floor ah officer room 2 leh Conference Hall a awm a ni.
Project Director office hawnna inkhawmah hian Pi Irene Zohlimpuii Chongthu Addl. Secy. RD Department in inlawmna thu a sawi a, Pu Lalfakzuala, Project Director, DRDO, Khawzawl District-in technical report a pe a, Pu R. Lalthazuala, Director, RD Department in lawmthu sawiin hun a khar a ni.
Vawiin DRDO office hawnna inkhawmah hian Aizawl atangin Rural Development staff te, Khawzawla sawrkar pisa hrang hrang hotute, Khawzawl khaw chhunga Village Council hrang hrang hotute, khawtlang hruaitu te leh sawm bik mi pawimawh te an tel a ni.
Attachment
- Loading attachment...
